Во оваа недела, во пресрет на големиот празник Воздвижение на Чесниот Крст и во деновите на претпразнувањето на Рождеството на Пресвета Богородица, Светата Црква нè повикува преку Евангелието да ја созерцаваме најголемата тајна на Божјата љубов кон човекот.
Во храмот „Успение на Пресвета Богородица“ во Македонска Каменица денес беа отслужени воскресна Утрена и Света Божествена Литургија.
Во својата беседа, о. Дарко го протолкува денешното Евангелие според светиот апостол и евангелист Јован (3, 13–17), особено зборовите:
„Зашто Бог толку го возљуби светот, што Го даде Својот Единороден Син, секој што верува во Него да не загине, туку да има вечен живот.“
Овие зборови се самото срце на Евангелието. Христос доаѓа во светот не за да го осуди човекот, туку за да го спаси. Како што Мојсеј ја издигна змијата во пустината, така и Христос ќе биде издигнат на Чесниот Крст, за преку Неговата жртва да ни биде даруван животот.
Затоа Крстот не е знак на пораз, туку знак на Божјата љубов, победата и спасението.
Денес Светата Црква го прославува и светиот маченик Созонт, млад христијанин кој со голема храброст ја исповедал верата во Христа и останал верен до крај. Неговиот пример нè потсетува дека вистинската вера не зависи од возраста или човечката сила, туку од срцето кое целосно Му се доверува на Бога.
А во деновите пред Рождеството на Пресвета Богородица, повторно ја гледаме Божјата промисла во историјата на спасението. Со нејзиното раѓање се подготвува патот кон доаѓањето на Спасителот на светот – нашиот Господ Исус Христос.
Нека ни помогне Бог да не ги закопуваме даровите што ни ги дал, туку да ја умножуваме верата со добри дела, љубовта со милосрдие, знаењето со служење, а времето со молитва.
Свети мачениче Созонте, моли Го Бога за нас!
Пресвета Богородице, спаси нè и застапувај се за нас пред Твојот Син и наш Бог!
Храм „Успение на Пресвета Богородица“ – Македонска Каменица