Општина Виница ја зголеми поддршката за првачињата од 3.000 на 5.000 денари
Советот донесе одлука на предлог на градоначалникот Митко Костадиновски – зголемени и наградите за државни натпревари и воведена поддршка за новороденчиња
ВИНИЦА – Советот на Општина Виница, на предлог на градоначалникот Митко Костадиновски, донесе одлука за зголемување на финансиската поддршка за семејствата кои имаат запишано првоодделенче.
Поддршката за секое првоодделенче запишано во основните општински училишта на територијата на општината се зголемува од 3.000 на 5.000 денари.
Со истата одлука зголемени се и наградите за учениците и нивните ментори за освоени места на државни натпревари. Наместо досегашните 2.000 денари, наградата за прво место ќе изнесува 5.000 денари, за второ место 4.000 и за трето место 3.000 денари.
За првпат во историјата на општината е воведена и финансиска поддршка за секое новороденче во износ од 6.000 денари. Од Општината информираат дека за осум месеци се поднесени 45 барања и исплатени се 270.000 денари.
Од локалната самоуправа најавуваат продолжување на мерките за поддршка на децата, младите и семејствата.