По повод Неделата на борба против гладта (16–22 октомври), Општинската организација на Црвениот крст – Делчево спроведе обемна хуманитарна акција за поддршка на социјално загрозени семејства, опфаќајќи ги општините Македонска Каменица и Делчево. Акцијата се реализираше под мотото „Помислете и на нас!“ и вклучи широк општествен ангажман на образовни и предучилишни установи од двете општини.
Во основните и средните училишта, како и во детските градинки во Македонска Каменица и Делчево, беа организирани собирни пунктови на кои ученици, наставници и родители донираа прехранбени производи. Во текот на акцијата беше собрана значајна количина храна, од која, со посветена работа на волонтерите, беа подготвени и распределени 120 хуманитарни пакети – 50 пакети во Македонска Каменица и 70 пакети во Делчево.
Од Општинската организација на Црвениот крст – Делчево нагласуваат дека акцијата претставува важен сегмент од нивните годишни хуманитарни активности.
„Нашата цел е градење солидарност и обезбедување поддршка за семејствата кои се соочуваат со социјални и економски предизвици“, изјавија од организацијата.
Тие додаваат дека „Неделата на борба против гладта е потсетник дека хуманоста е наша заедничка одговорност“.
Од ООЦК Делчево упатија и благодарност: „Голема признателност им должиме на волонтерите, наставниците, учениците и родителите кои се вклучија и ја направија акцијата успешно реализирана“.
Во активностите учествуваа ЈОУДГ „Бамби“ – Македонска Каменица, ООУ „Св. Кирил и Методиј“ – Македонска Каменица, СОУ „Миле Јаневски – Џингар“ – Македонска Каменица, како и Детска градинка „Весели Цветови“ – Делчево, ООУ „Ванчо Прке“ – Делчево, ООУ „Св. Климент Охридски“ – Делчево и Гимназија „Методи Митевски – Брицо“ – Делчево
Со успешната реализација на акцијата, Црвениот крст и заедницата уште еднаш покажаа дека преку заедничка солидарност може да се направи значајна промена за оние на кои поддршката им е најпотребна.