Општина Македонска Каменица со посетата на Рикалдоне, Пиемонт гради нови мостови на соработка за зголемена поддршка за нашинците во странство

Рикалдоне, Италија 16. Јули 2022 година – Делегација од општина Македонска Каменица, предводена од градоначалникот Димчо Атнасовски е во тридневна посета на општина Рикалдоне, Италија. Таму, покрај остварените средби со претставници од локалната управа и градоначалничката на општина Рикалдоне, Лаура Грациела Бруна беа реализирани бројни средби и богата културно уметничка програма со нашинците од овој дел на Пиемонт.

Целта на оваа посета и турнеја, како што информираат од Општина Македонска Каменица и КУД “Вера Јоциќ”, првенствено е одржувањето на блиски врски и подобри релации со нашинците во странство. Со оваа посета, како што истакна градоначалникот Атанасовски. сакаме преку продлабочувањето на соработката со општините каде што живеат нашите иселеници, да изградиме нови можности за поголема поддршка кон овие наши сограѓани.

Видео со дел од обраќањето на градоначалникот Атанасовски пред пристуните нашинци во Рикалдоне ОВДЕ

За богатата културно уметничка програма и дружење со нашинците во овој дел од Италија, беа задолжени КУД ,,Вера Јоциќ” од Македонска Каменица со афирмираниот музички состав “Модерато” и познатата естрадна уметничка од Македонија, Елена Велевска. Тие одржаа одлични настапи, проследени со силно воодушевување и заедничка веселба со бројната публика. – Сакам да ја поздравам перфектната организација на навистина богатата културно уметничката програма, како и срдечниот прием од нашите иселеници. Се надевам дека успеавме преку дружба и веселба да допринесеме во дополнителна промоција на македонскиот фолклор и традиција помеѓу нашите иселеници и граѓаните на Пиемонте, Италија“ – дополни градоначалникот Атанасовски

 

 

Градоначалниците Лаура Грациела Бруна и Димчо Атанасовски, присуствуваа на потпишувањето на Меморандумот за соработка помеѓу македонско здружение „Заедно – Инсиеме“, чиј претседател е Златко Мичлевски и Еколошкото друштво „Здравец 2002“ од Македонска Каменица преставено од претседателот Миран Митревски.

Минатата година, во организација на членовите на друштвото „Инсиеме“ Рикалдоне и МПЦО „Св. Архангел Михаил“ во Неиве, Општина Македонска Каменица се збратими со италијанските општини Рикалдоне, Касине и Аличе Бел Коне.

Моменти од настапите на КУД Вера Јоциќ, Модерато Бенд и Елена Велевска можете да погледнете на: ВИДЕО 1, ВИДЕО 2.