Од утре ќе поевтинат тестенините и млечните производи. Министерот Бектеши најави дека Владата ќе ги замрзне нивните цени. Шпагетите и макароните ќе се продаваат за 10% пониско, додека цената на млекото, сирењето, кашкавалот, урдата, павлаката и јогуртот ќе се знаат наскоро. Анализите се при крај – простор за намалување на цените има, вели Бектеши, и тоа, не само кај овие, туку и кај други производи.
– Над 10% ќе ги намалиме цените на тестенините, а за млечните производи, ќе оставиме за утре. Затоа јас ги повикувам производителите на овие ппродукти да ги намалат цените уште денеска, како што тоа го направија некои произоводители, а ако не ги намалат тие, ние ќе преземеме, изјави Крешник Бектеши, министер за економија.
Министерот Бектеши вели дека бил во комуникација со производителите на тестенини и на некои млечни производи и тие имале интерес да ги намалат цените. Ова доаѓа по одлуката за замрзнување на цената на лебот, кога од мелничко пекарската индустрија престанаа со испорака и се заканија дека ќе ја тужат државата. Но министерот вели – правдата е на наша страна.
Високите сметки за струја им беа главниот адут на производителите за поскапување на производите. Откако добија субвенционирана струја од државата, а цените не ги намалија, се правдаа дека другите трошоци им биле зголемени. Затоа покрај ограничени маржи, владата сега ќе ги ограничува и нивните цени.