Лекарите алармираат: Со топлото време демнат опасностите од труења со храна. Високите температури и влагата се многу поволни за бактериите, па храната и пијалоците, колку задоволство, толку можат да бидат и опасност.
Најчести бактерии кои предизвикуваат труење се: салмонела, ешерихија коли и стафилококите. Типични симптоми се гадење, повраќање и дијареа. Ваквите симптоми можат да предизвикаат дехидрација, која во најтешките случаи може да биде опасна по живот.
- Доколку пациентите почувствуваат симптоми кои што можат да асоцираат на труење со храна, пред се, би требало да се јават кај својот матичен лекар, да се оваа состојба потврди, и според инструкциите на лекарот да се придржуваат кон консумирање на течности, консумирање на полесна храна и секако земање на ординираната терапија, изјави Д-р Александар Димитровски, ПЗУ „Д-р Златко Стојменов“.
Граѓаните најмногу се сомневаат во производителите на храна, а самите веќе преземаат мерки за заштита.
- Не знаеме што јадеме, никој не ни гарантира. Ама ја чуваме храната во фрижидер и се трудеме да ја задржеме свежа, ако е стара ден-два во ред е, ако не, ја фрламе, изјави анкетиран граѓанин.
Иако повеќето луѓе стравуваат од труење во рестораните, кафулињата и продавниците, статистиката вели дека најголем дел од труењата настануваат во домовите. Според тоа, лекарите даваат препораки како да се чува и постапува со храната.
- Мерки на претпазливост во летниот период кои најчесто ние лекарите ги препорачуваме се често и темелно миење на рацете, миење на храната, особено на зеленчукот и овошјето, и секако чување на храната во фрижидер и тоа храна од типот на јајца, месо, млеко и млечни производи, изјави Д-р Александар Димитровски, ПЗУ „Д-р Златко Стојменов“.
Доколку се почитуваат препораките на лекарите, место за паника нема. Иако масовното индустриско производство на храна и пијалоци ретко ни дава до знаење што се внесуваме во себе, сепак високата претпазливост може до одредена мера да ни гарантира безбедност во овие неколку ризични месеци од годината.