Регионалниот центар за управување со кризи (РЦУК) Штип преку РЦУК Кочани вечерва извести дека во кочанскиот регион има обилни врнежи, а со тоа е згоелемен преливот на браната од акумулацијата Гратче. Зголемен е и водостојот на реките Кочанска и Оризарска.

Водостопанство Брегалница од Кочани пак информира дека поради врнежите што го зафатиле регионот Пониква и општините Kочани, Зрновци и Чешиново-Облешево, при мерењата во 21 часот на браната Гратче е регистрирано и големо зголемување на дотокот од денешните 1,3 метри кубни во секунда на 4 метри кубни во секунда. Со тоа е зголемен и преливот на браната, а и водостојот на реките Кочанска и Оризарска.

„Предупредуваме на внимателност и подготвеност за ваквата можна состојба, бидејќи ако дојде до поголемо зголемување на водостојот на овие реки во кочанско, можни се излевања во долниот тек на реките и поплавувања на земјоделско земјиште, а и дворови во селата низводно“, предупредуваат од ЦУК.