Од 1 јануари, во сметките за струја ќе се воведе нова давачка за пристап до мрежа. Како што кажа претседателот на Регулаторната комисија за енергетика (РКЕ) Марко Бислимоски, со оваа давачка ќе плаќаат повеќе оние кои имаат викендици или повеќе станови кои не ги користат.
Во месечната фактура, освен цената на електрична енергија и цената за мрежарината во која што влегува пренос и дистрибуција, ставката за дистрибуција ќе се раздвои и со потставка пристап до мрежа.
„Станува збор за порано употребуваниот фер принцип за сијалично место – пристап до мрежа. Практично, тоа значи дека најголем број потрошувачи ќе добијат пониски сметки за мрежарина, додека оние кои користат викендички ќе плаќаат за пристап до мрежа. Со оваа реформа ќе се закружи процесот на фер сметки и ќе се обезбеди правична распределба на трошоците меѓу оние кои редовно ја користат мрежата, од другите кои тоа го прават повремено, како во викендичките, или пак поради тоа што користат сопствено производство на струја од фотоволтаици“, рече проф. Рубин Талески.
Бислимоски кажа дека досега не било фер редовните потрошувачи со еден стан да плаќаат повеќе.
„Зар на некој што има пет стана му е проблем да плати плус 100 денари? Се прават анализи колку ќе биде оваа давачка, но ќе биде меѓу 50-250 денари”, рече Бислимоски.
Регулаторната комисија ги доби барањата за определување на нови тарифи на АД МЕПСО Скопје, Електродистрибуција ДООЕЛ Скопје и МЕМО ДООЕЛ Скопје. Станува збор за три од пет елементи што ја сочинуваат крајната цена и врз кој РКЕ има надлежност да ги утврдува.
„Доколку се прифатат барањата од енергетските компании, цената на електричната енергија од 1 јануари ќе се зголеми за 27 %, но дали и колку ќе има зголемување ќе покажат деталните анализи. Сега влегуваме во процес во којшто детално ќе се скенираат сите трошоци на овие три компании и ве уверувам дека ќе бидат прифатени и одобрени само оние ставки што ќе овозможат стабилна и сигурна испорака на електрична енергија исклучиво по принцип на домаќинско работење“, рече Бислимоски.
Извор: sdk.mk