Баскет кам го доби дуелот што требаше да биде дерби, против Бадел 1862 (73:53)
Едно полувреме траеше неизвесноста на дуелот кој требаше да го одбележи првото првенствено коло во новата сезона од Првата лига-жени – натпреварот во салата „Независна Македонија“ каде Бадел 1862 го предизвика шампионот Баскет кам од Македонска Каменица.
Сепак, Бадел 1862 со неколкуте нови имиња како Јована Петрушевска и Марија Николов, беше конкурентен само во првото полувреме, кога бранителот на шампионската титула имаше водство до четири поени (33:29).
Во продолжението на играта се разигра, во прв ред, Цветанка Димова. Делуваше незапирливо за противничката одбрана. На крајот на третиот период екипата од Македонска Каменица водеше со двоцифрени (51:38), за во последната разликата да порасне на 20 поени.
Димова застана на ефект од 29 поени (5/7 за три, 6/11 за два поени), имаше и седум скока, две асистенции. Одлична секвенца имааше и Максимовска, стрелец на 14.поени, додека пак Кметовска го заврши натпреварот со двоен ефект, односно 13.поени и 11 скока (плус 4 асистенции).
Извор: КФСМ