Денеска е последниот ден на весниците Утрински и Вест. Згаснува една децениска новинска куќа која беше вистинско богатство на македонското медиумско небо.
Сагата на весниците трае веќе неколку години а последните месеци кризата се продлабочи, немаше плати, почнаа штрајкови.
Според досегашните информации весниците „Утрински“ и „Вест“ ќе станат веб-портали со по неколку вработени, а останатите ќе останат без работа.
Неодамна новинарите штрајкуваа поради неисплатени плати. Тие бараа средба со сопственикот Срѓан Керим, но средба немаше.
Во меѓувреме, отворена е нова фирма, со слично име, Медиа Принт ДООЕЛ, кој објави огласи за вработувања на новинари и уредници.
Новинарите добија поддршка од Самостојниот синдикат на новинари и медиумски работници на Македонија и од Европската федерација на новинари, чиј генерален секретар, Рикардо Гутиерез, присуствуваше на собирот.