Песната „Dance Alone“, со која Јана Бурческа ќе ги брани боите на нашата земја на претстојното, 62. по ред издание на „Евровизија“, стана инстант хит за евровизиските фанови, а што е уште поважно, одлично е прифатена и од домашната публика, но и од колегите на Јана.
Сепак, се чини дека песната најмногу ѝ се допаднала на Наташа Малинкова, која одлучи да направи одлична акустична преработка. Во придружба на Столе Аврамов на гитара, пејачката ѝ даде една поинаква димензија на евровизискиот хит, а како звучи сето тоа можете да слушнете горе.
Имајќи го предвид сè поголемиот успех на „Dance Alonе“, која се најде и меѓу десетте најгледани видеа на евровизискиот канал на Јутјуб, а полека се приближува и кон најдобрите 10 според обложувалниците, годинава можеме да очекуваме нов рекорд во македонската евровизиска историја.
Јана ќе настапи во втората полуфинална вечер на 11 мај, а се надеваме дека уште еднаш ќе ја видиме и во големото финале на 13 мај. Среќно!