Православните верници во Македонија денес, 7. април, го слават празникот Благовештение на пресвета Богородица – Благовец, ден посветен на новозаветниот настан кога архангел Гаврил ѝ се јави на Богородица и објави дека преку Светиот Дух ќе добие дете, односно Исус Христос.

Благовештението се смета за еден од најрадосните христијански празници, а многумина го поврзуваат со добра вест.

За овој празник се поврзуваат различни обичаи, но најважно е да пронајдете внатрешен мир, да се радувате и да бидете во хармонија со себе – со светлата страна на вашето битие.

Благовец во основа значи да се радуваме на прекрасни вести и на овој ден треба да научиме да се радуваме на сè што ни носи животот. Кога срцето е отворено, а душата чиста, можеме да се радуваме на Сонцето, на новиот ден, на насмевката на минувачите, на среќата на друга личност… Кога радоста е присутна во животот, тогаш навистина живееме.

Овој ден нè потсетува и на тоа зошто е важно да бидеме благи луѓе – оние кои сакаат со срцето и им се враќа со срце.

Денес е голем ден за сите оние луѓе кои и по неволји, препреки, порази, несреќи, не ја изгубиле вербата и способноста да се радуваат, туку секогаш успевале да ја вратат смиреноста. Тоа се постигнува со постојана работа на себе.

Интересни се старите обичаи поврзани со овој празник. Порано се станувало рано на Благовештение, понекогаш и по полноќ, а најчесто пред зори. Се верувало дека на овој ден треба да се слуша песната на девојките, а на некои места девојките собирале дрва и палеле голем оган.

Постои верување дека на овој ден треба да се миеме во река или во поток.

Благовец особено го слават жените, бидејќи ова е празник на Богородица. На овој ден, жените се молат за потомството, децата и семејството. Се верувало дека овоштарите треба да садат плодови на Благовештение, а лозарите да ја закројат лозата. Благовец се празнува точно 9 месеци пред Божиќ.