Македонска Каменица, 31.05.2021 година – После апсолутната доминација на македонската кошаркарска сцена и освоените титули во Купот на Македонија и титулата од Шампионатот на Македонија за жени во 2020/21 сезона, екипата на Баскет Кам од Македонска Каменица доби покана за учество во европската WABA лига.
Радоста за освоените титули не стивнува, а девојките на Баскет Кам имаат нов предизвик пред себе – учество во WABA европската лига. Со огромниот остварен успех на Баскет Кам – Македонска Каменица добива можност да се натпреварува заедно со екипи од Словенија, Хрватска, Србија, Унгарија, Црна Гора, Бугарија, Турција, Романија, од оваа година повторно и Италија.
Македонска Каменица веќе е препознаена како престолнина на женскиот спорт и шампионски град во женска конкуренција во кошарка и фудбал. Надигрувањето со кремот од европската кошарка е повеќе од заслужено за девојките од Баскет Кам – Македонска Каменица.
Вака силен развој на женскиот спорт е вистинска реткост во Европа. Македонска Каменица не треба да ја пропушти оваа шанса. Учеството на Баскет Кам во едно од најсилните европски кошаркарски лиги, покрај бенефитите за заедницата, ќе значи и огоромна промоција за Македонска Каменица.
Европа заслужува да ја запознае убавата и успешна спортска приказна на Македонска Каменица!
