Комисијата пред одлука – ќе паднат ли маските на отворено?

Комисијата пред одлука – ќе паднат ли маските на отворено?

Комисијата за заразни болести ќе ја разгледа можноста за укинување на полицискиот час и дополнително олабавување на мерките против Ковид-19.

FFP2-Schutzmaske 

Комисијата за заразни болести денеска ќе ја разгледа можноста за дополнително олабавување на мерките против Ковид-19. Се очекува да се донесе одлука за укинување на полицискиот час којшто е на сила, како и укинување на наредбата за носењето маски на отворено. Заменикот министер за здравство Илир Хасани, кој е член на комисијата, вели дека со оглед на тоа што епидемијата стивнува, треба да се укине полицискиот час, како и обврската за носење маски на отворено.

-повеќе на темата: Од 1 јуни збогум за маските на отворено?

„Мојот став е да ги укинеме маските на отворено. И за полицискиот час мислам дека е време да се размисли во таа насока. Мојот конечен став е за прекинување на полицискиот час, сепак Комисијата за заразни болести ќе донесе одлука заснована врз општата епидемиолошка состојба, нивните параметри, врз основа на прогнозите и врз основа на информациите што ги имаме за другите видови на вируси, како и според потенцијалниот ризик“, изјави вчера Хасани. Тој најавува дека постепено ќе се носат одлуки и за организирањето разни собири.

„Нема да има брзо враќање во дискотеките и брзо дозволување на свадби какви што имавме порано. Но, секако дека ќе има бавно враќање на големите семинари, на свадбите и слично“, додава тој.

-повеќе на темата: Филипче најавува свадби на отворено и ковид пропусници за патување 

Комисијата за заразни болести ќе донесе одлука врз основа на целокупната епидемиолошка ситуација, врз основа на предвидувањата и информациите коишто ги има во однос на другите соеви коишто се потенцијален ризик за земјата, како што е на пример индискиот сој и други.

Според извештаите на Министерството за здравство вкупно 249 пациенти се лекуваат на инфективните одделенија во главниот град и во болниците низ земјата. Во последните 24 часа се регистрирани 53 нови случаи со Ковид- 19. Вкупно оздравеле 111 пациенти, а починале 13 лица. Поради намалениот број на заразени лица, болниците затворија дел од капацитетите во кои беа сместени ковид-пациенти. Но, бројот на починати лица и натаму е висок. Според Хасани, во моментот во болниците се најтешко болните, оние кои имаат пролонгирана болест и се изложени на голем процент на смртност.

„Генерално, мислам дека се очекувани бројките на починати да се намалуваат за две до три, можеби и четири недели од намалувањето на бројката на новозаболени“, изјави заменик-минисерот за здравство.

Leave a Reply

Your email address will not be published. Required fields are marked *