Македонската репрезентација успеа да го добие историскиот натпревар во Тбилиси на Динамо Арената, против домашната селекција на Грузија, во финалето на Лигата на Нации.
Во првиот дел очекувано, тврда и рововска битка се водеше на теренот во Тбилиси меѓу Грузија и Македонија.
Главно играта на средината на теренот, со многу борба, и со многу грешки. Грузијците беа нешто подобри во поседот на топката, имаа и три шанси, додека Македонија еднаш преку Пандев се закани со директна закана кон Лорија, кој одбрани и изби во корнер.
Во вториот дел средбата започна мирно, а потоа, во 56-та минута се случи најдобриот момент од средбата.
Акција како од фудбалските учебници, во тика-така стил. Елмас си поигра со противниците, со топката играше и Несторовски, а одличната акција со гол ја круниса Горан Пандев.
Во остатокот од средбата Македонија беше подобар противник, уште две одлични шанси за гол имаше Елмас, најпрво во 66-та, а потоа и во 75-та минута од средбата.
До крајот нашите момци издржаа и го остварија сонот – обезбеден пласман на Европското првенство 2021 – за прв пат во историјата на Македонија!