Осуммина планинари на ПСД Осогово успешно ја изведоа акцијата за искачување на Руен во зимски услови, како дел од тренинг програмата за високогорски акции.
Дел од акцијата беа и Виктор Симовски и Тошо Антов. Двајцата најискусни кочански планинари зад себе ги имаат некои од највисоките европски врвови, како Мон Блан, Елбрус и Гран Парадисо.
Осум члената екипа ја тестираше својата издржливост, својата опрема и подготвеноста за искачување во тешки услови.
Искачувањето беше пропратено со температура под минус 10 степени, длабок снег, наноси и многу ниска видливост под 30 метри.
Ваквите искачувања се со цел планинарите да се подготват психолошки, физички, но и да ги најдат недостатоците на својата опрема, работи кои се клучни при акциите на високогорските акции.
Со ваквите проверки планинарите знаат дали се подготвени за искачувањата кои летово претстојат на највисоките балкански и европски врвови, акции кои на ПСД Осогово во 2017 му го донесоа признанието најуспешен спортски клуб на Истокот.