Денес, во општинската Сала за состаноци беа примени учениците кои добија стипендија од општина Македонска Каменица. На денешниот прием кај градоначалничката Соња Стаменкова тие ги потпишаа и договорите за стипендија и по комплетното завршување на постапката, стипендиите ќе бидат исплатени.
„Чест ми е што денес сме домаќини на сите овие особено талентирани ученици кои ќе бидат стипендирани од општина Македонска Каменица, особено поради фактот што го зголемивме и бројот и износот на месечните стипендии. Верувам дека нашата поддршка ќе им биде од огромна корист и дека сите тие ќе продолжат по истиот пат и нивните успеси во образовниот процес ќе продолжат. Општина Македонска Каменица ќе продолжи да инвестира во подобрување на квалитетот на образованието и со поддршката и на учениците и на наставниот кадар, а се надевам дека веќе од претстојната година ќе имаме можност за дополнително зголемување на бројот на стипендираните ученици и студенти. Ние ќе вложуваме во нив, затоа што сме свесни дека тие се нашата иднина и дека тие може да допринесат за развој на Македонска Каменица“ – изјави Соња Стаменкова, градоначалник на општина Македонска Каменица.
Инаку, општина Македонска Каменица годинава доделува вкупно 20 стипендии за ученици и студенти, а месечниот износ на стипендијата изнесува 3.000 денари.