Се одржа „Gratche Trail Run” во организација на МТБ – „ИСТОК“

Над 150 натпреварувачи учествуваа на третиот натпревар во планинско трчање „Gratche Trail Run 2019″, што денеска се одржа на падините на Осоговските Планини, а чиј организатор е Друштвото за спортови во планина МТБ „Исток” од Кочани.

Должината на патеката изнесуваше 13 километри, со вкупна висинска разлика од 660 метри, а учесниците трчаа низ прекрасните предели на браната Гратче, селата Горно и Долно Гратче, како и водопадите на Голема Река.

– Трката има за цел да ги промовира убавините на браната Гратче и Осоговијата, како и да придонесе за развој на планинското трчање и спортот воопшто, односно да биде поттик за младите генерации да се занимаваат со спорт. На минатогодишното издание на „Gratche Trail Run” учествуваа 190 натпреварувачи, а сличен одзив имаме и годинава, што е извонредна бројка за ваков настан. Љубителите на природата и на планинското трчање, не само од Кочани, туку и од Штип, Виница, Велес, Гевгелија, Скопје и другите градови ни се придружија на трката што во наредниот период планираме да ја прошириме, односно да ја зголемиме должината на патеката и да добие меѓународен карактер, истакна Панче Зафиров, претседател на МТБ „Исток”.

Како подготовка за планинското трчање, членовите на Друштвото МТБ „Исток”, се придружија на еколошката акција на компанијата „Амфенол Технолоџи Македонија” и здружението „Не биди ѓубре”, при што паралелно со маркирањето на патеката ја чистеа околината на водопадите на Голема Река каде што минува и самата патека на трката.

За успешно организирање на планинската трка финансиска поддршка беше обезбедена од локалниот бизнис сектор, како и волонтери членови на МТБ „Исток”.

МИА

Leave a Reply

Your email address will not be published. Required fields are marked *