Жителите од делчевски Стамер сами си ја градат црквата во селото

Во делчевското село Стамер жителите ја градат првата црква. Организирани сами  и со поддршка на донатори, тие успеаја да го издигнат храмот кој го  посветуваат на светиот пророк  Еремија, кога се слави и славата во селото.

  • Проектот ни од владиката Иларион спрема бројот на населението така се прави и квадратурата, материјалите се донација од разни физички и правни лица, а местото, 510 квадрати, е донација од нашиот сограѓанин Игнат Николовски. Планираме да го средиме и хортикултурно, вели Зоран Димитровски, жител на село Стамер.

Досега во изградбата на црквата е инвестирано 12 илјади евра. Но, според пресметките, овде е потребно уште околу 6 илјади за фрескоживописот.

  • Апел до нашите сограѓани и пошироко во странство за да помогнат за црквата, а кој што ќе донира ќе биде исцртана негова слика во црквата, вели Зоран Димитровски, жител на с. Стамер.

Значењето на црквата е големо за жителите од селото кое некогаш било турско, а од 60-тите години на минатиот век, овде се населуваат, христијаните.

  • Патрон празник на селото е Свети Еремија, тој е голем христијански празник, јас се сеќавам како дете дека во 70-те години немаше дожд и по обречувањето на славата заврна дожд, вели Мирко Стојменовски, жител на Стамер.

Жителите очекуваат дека сите градежни работи и хортикултурното уредување ќе бидат готови до идната пролет, а првата богослужба во првата црква во селото ќе се одржи на празникот посветен на светот пророк Еремија на 14 мај.

Leave a Reply

Your email address will not be published. Required fields are marked *